എൻജിൻ റൂം നശിപ്പിച്ചെന്ന് ട്രംപിന്റെ അവകാശവാദം, പ്രത്യാക്രമണമെന്ന് ഇറാൻ; ഹോർമുസിൽ വീണ്ടും അശാന്തി?

​യുഎസ് ഉപരോധം മറികടക്കാൻ ശ്രമിച്ച ഇറാനിയൻ ചരക്കുകപ്പൽ ഒമാൻ കടലിടുക്കിൽ വെച്ച് യുഎസ് നാവികസേന പിടിച്ചെടുത്തുവെന്ന് യുഎസ് പ്രസിഡന്റ്ഡൊണാൾഡ് ട്രംപ്. ഏകദേശം 900 അടി നീളമുള്ള ‘ടൗസ്ക’ എന്ന ഭീമൻ കപ്പലാണ് പിടിയിലായത്. ഒരു വിമാനവാഹിനിക്കപ്പലിനോട് കിടപിടിക്കുന്ന വലിപ്പമുള്ള ഈ കപ്പൽ, യുഎസിന്റെ വിലക്കുകൾ ലംഘിച്ച് നീങ്ങിയതാണ് നടപടിക്ക് കാരണമായതെന്ന് യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചു.

ഒമാൻ കടലിടുക്കിൽ വെച്ച് ​യുഎസ് നാവികസേനയുടെ യുഎസ്എസ് വാൻസ് (USS Vance) ആണ് കപ്പൽ തടഞ്ഞത്. കപ്പൽ നിർത്താൻ നാവികസേന ആവർത്തിച്ച് മുന്നറിയിപ്പ് നൽകിയെങ്കിലും ഇറാനിയൻ ക്രൂ അത് അനുസരിക്കാൻ തയ്യാറായില്ല. ഇതേത്തുടർന്ന് നാവികസേന കപ്പലിന്റെ എൻജിൻ റൂം തകർക്കുകയും കപ്പൽ പൂർണ്ണമായും തങ്ങളുടെ നിയന്ത്രണത്തിലാക്കുകയും ചെയ്തു. നിലവിൽ കപ്പൽ യുഎസ് നാവികരുടെ കസ്റ്റഡിയിലാണെന്നും വിശദമായ പരിശോധനകൾ നടക്കുകയാണെന്നും ട്രംപ് തന്റെ സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യലിൽ’ കുറിച്ചു.

​നേരത്തെയും നിയമവിരുദ്ധമായ പ്രവർത്തനങ്ങളിൽ ഏർപ്പെട്ടിട്ടുള്ള ടൗസ്ക, അമേരിക്കയുടെ കരിമ്പട്ടികയിൽ ഉൾപ്പെട്ട കപ്പലാണ്. അന്താരാഷ്ട്ര തലത്തിൽ ഇറാനുമേൽ ഏർപ്പെടുത്തിയിട്ടുള്ള സാമ്പത്തിക-പ്രതിരോധ ഉപരോധങ്ങൾ ലംഘിക്കുന്നതിന്റെ ഭാഗമായാണ് കപ്പലിന്റെ സഞ്ചാരമെന്നാണ് യുഎസ് വിലയിരുത്തുന്നത്. കപ്പൽ യുഎസ് പിടിച്ചെടുത്ത കാര്യം ഇറാൻ ഔദ്യോഗികമായി സ്ഥിരീകരിച്ചിട്ടുണ്ട്. ഇത് മേഖലയിൽ വീണ്ടും സംഘർഷാവസ്ഥ വർദ്ധിപ്പിച്ചിരിക്കുകയാണ്.

​അതേസമയം, ഇറാനുമായുള്ള പോരാട്ടം അവസാനിച്ചിട്ടില്ലെന്ന് ഇസ്രയേൽ പ്രധാനമന്ത്രി ബെന്യാമിൻ നെതന്യാഹു പ്രതികരിച്ചു. ലോകത്ത് ഭീകരത പടർത്തുന്ന ഇറാൻ എന്ന ഏകാധിപത്യ ഭരണകൂടത്തിനെതിരെ അമേരിക്കയുമായി ചേർന്ന് പോരാട്ടം തുടരുമെന്ന് അദ്ദേഹം വ്യക്തമാക്കി. പാശ്ചാത്യ നാഗരികതയെയും ഇസ്രയേലിനെയും തകർക്കാൻ ശ്രമിക്കുന്നവർക്കെതിരെ വലിയ നേട്ടങ്ങൾ കൈവരിച്ചിട്ടുണ്ടെന്നും, ഏത് നിമിഷവും ഇറാനെതിരെ പുതിയ മുന്നേറ്റങ്ങൾ ഉണ്ടാകുമെന്നും നെതന്യാഹു മുന്നറിയിപ്പ് നൽകി.